2Cor 13 | APZ | STEP | Sɨkuno hufa'uso nto se'ma'mentohefoho. Olohonta se'ma'meso hufa'u sɨhune umo'nɨmontonoho. Anɨtuye hungkuno ole naliso. A'amu hufa'utaho hufa'u sɨhunetaho, hofɨko nom'ni hwafe yahino wonyo somne'no sɨmeho afa inɨngkuji ujo ehontojwasyɨkujo'no nakwo nehopeho wolantanoho. Ose'manji ngko sekuyepono se'mayo hufa'u sɨhune imo'nɨngkuhwoso'no yahino wonyo ne'no nowentanɨngkuhwoso'manji ngko wonyo ne kuyoho waselɨmonnoho.

2 Corinthians 13

A'amu Koulinɨso hofɨkoe sɨmeho hi'ntnnonohino somo ito'no mokosyohumayo'ne Poul kako hungkuno yokumpohn'nyo ulɨmentisofoho.

1 Sɨkuno hufa'uso nto se'ma'mentohefoho. Olohonta se'ma'meso hufa'u sɨhune umo'nɨmontonoho. Anɨtuye hungkuno ole naliso. A'amu hufa'utaho hufa'u sɨhunetaho, hofɨko nom'ni hwafe yahino wonyo somne'no sɨmeho afa inɨngkuji ujo ehontojwasyɨkujo'no nakwo nehopeho wolantanoho. Ose'manji ngko sekuyepono se'mayo hufa'u sɨhune imo'nɨngkuhwoso'no yahino wonyo ne'no nowentanɨngkuhwoso'manji ngko wonyo ne kuyoho waselɨmonnoho. 2 Hohonta ngko sekwo'nji humamentohe sohonta a'amu yahino wonyo imotofo sohwahnne'no hungkuno yokumpohn'nyo nto selɨmentohefoho. I olohonta ngko ikanopo fosyohumawenji ngko yahino wonyo homo somne'no hungkuno yokumpohn'nyo apa'no selalokweno. I ngko se'ma'me sohonta yahino wonyo ne'no wojo'manji ngko hungkuno toho pa'nyo selɨ'mo yahino wonyo somne'no sekwo hopi'nonohino sokumo tohino wosejapmmonnoho. 3 Sekwo ose nuhwonɨngkujo'manji sekwo huno ole waseyono. Kɨlais kakoe hungkuno ntopahonɨngki ngko hungkuno hiso selɨwo'nɨngkohe hwo'nyoho. Huno ose waseyono Kɨlais kako sekwoe yahino somo yano selofiyoso sohonta kako hwe yokumpohn'nyo ane hwo'maho. O'o, kakoe yokumpohn'nyoso wosetɨhwamontonoho. 4 Hohonta Kɨlais kakoe a'apaho yokumpohn'nyo ane pa'nyohwo imo'nɨngkahonɨngki hofɨko kakimo iyo hwojiyafɨku'nnyopo fonjito'ofahumentohofofoho. I oso'no kako olohonta Anɨtuye yokumpohn'nyo'nji songo humaho. Oso pa'nyoso nakwo hi'nwi nakwoe a'apahoso yokumpohn'nyo ane'nwoho. I oso'no nakwo Kɨlaisɨ'nji mojopohi'nontani kakoe yokumpohn'nyo'nji humalohwono. Oseso nakwo sekwo'nji nohumehwasi Anɨtuye yokumpohn'nyoso sekwo'njopo u'mofapmmontonoho. Oso'no Anɨtuye yokumpohn'nyoso sekwoe yahino somo ito'no mɨhwajiyo'ne weho.

5 Sekwo sekwoe humayo somne'no yano inɨfijoso huno ito'no fɨsyafɨhupmno. Sekwo Kɨlaisɨye yahino somo nehopi linɨngkowalokwofo. Sɨmeho hi'ntnnono kakimo nehopi luyalokwofo. Kɨlais kako sekwoe sɨmeho mo'mo nehopi lohumaho. I sekwo Kɨlaisɨye yahino somne'no poji liyalokwofo. Sekwo sekwoe yahino somo yano finɨmno. 6 Sekwo oso pa'nyoso nje yahinomo nohonɨngkuji yano inɨngkuji sekwo huno ole waseyono. Poul kako Kɨlaisɨye a'amu ne hweho. 7 Sekwo honɨngkano wonyo mifitnne'entani nakwo Anɨtu sefo'mayo'ne jomo ulɨwo'nɨngkuhwone'nwoho. Hwapɨngoso peho'neto. A'amu hofɨko sekwoe honɨngkano wopɨngo'nohini somo sehonɨngkuji nakwo Anɨtuye hungkuno nehopi losetɨhwamentɨhwone so'no nakwoe yofe ho'nonemayo'netaho. O'o, oso'ne'maho. A'amu nje syoho somne'no ngkimo sitofo ko ntɨkuji sekwo Kɨlaisɨye honɨngkanomo ito'nohino finɨngkamno. 8 Nakwo Kɨlaisɨye hungkuno ne somo monje mesyanehwono. O'o, nakwo Kɨlaisɨye hungkuno ne somo sosofitofo'ne'entani yɨhwono. 9 Nakwo yokumpohn'nyo ane ko huhwona'ni sekwo yokumpohn'nyo lohopijo'manji nakwo sɨmonyo uyantanoho. Olo hilo so'no nɨmo'nɨngkohoho. Sekwo Kɨlaisɨye yahino ne somne'no sokafo mafɨkuno. Oso hiso'no sɨkuno huhwo huhwi Mpohumo jomo ulɨwo'nalokweno. 10 Olohonta ngko ikanopo nohumanji olo iyoswo loso semtɨ'mokiyalokweno. Hwapɨngoso sekwo hungkuno homo somo haloho pekujo'no hwangku ngko se'mahm'mo yoka maselɨmnehono. Oso yokumpohn'nyo sekwoe yahino somo ito'no mɨhwajiyo'ne Kɨlais ntapmmentiso so'no sekwo tohino masemnonehoho. Oso yokumpohn'nyo ntapmmentiso hiso sekumo wonyo semokiyo'ne'maho. O'o, sekumo sesofitofo'ne ntapmmentisofoho.

Hungkuno ae'uyoponoho.

11 Ou, nje a'amu soku, nje hungkunoso ngko moi'wo wolosejwao'monne'no yohono. Sekwo hopi'nonohino soku, sekwo yokumpohn'nyo yoho'nɨngkuji honɨngkano ito'nohinomo finɨngkamno. Nje hungkunomo haloho ito'no popmno. Sekwo sɨmeho afa'nohini inɨngkuji sɨmeho pompenjiyo'nji fosyohumantɨkuno. Ose ifijo'manji Anɨtu kako hitoho hwapɨngo sohwo, sekwo'nji nohumahwosi sekumo hofiyo wosemokosyohumantonoho. 12 Sekwo Kɨlaisɨmo inɨngkawo'nɨngkohofo soku, sekwo nuhu'mokukuji sekwo a'amu anga'no anga'nohinomo ahopo'nɨmno. Anɨtuye a'amu oloponjo hn'nwi nakwoe a'amu kuyoho. 13 Nakwoe Hwe Engo Jisas Kɨlais kako sekumo wopɨngo waselohofono. Anɨtu kako sekumne'no hitoho wosejapono. Anɨtuye Towahuno Wopɨngo sohwo kako sekwoe sɨmeho mo'mo engolopohamo wohumano.